بسم ربي صوتت كل المناير

والشعر حولي وانا مانيب حوله

يالله انك عالم بكل السراير

فرج اللي تعرفه من قبل أقوله

أطلب الرحمه و غفران الكباير

و العفو في يوم يأخذنا ذهوله

و الكباير سبة اتيان الصغاير

و الصغاير غلطة النفس الجهوله

و الزمن ساطي على العالم و جاير

و الهموم مسويه بالصدر دوله

كل ما دارت على راسي الدواير

قلت ربي لا(تكن) نفسي عجوله

قمت اصوت و اعتزي (هابس يا ثاير)

صرخةً تملى الفضاء عرضه و طوله

ما ضريت الا على فج النحاير

و ما فطمت الا على كسب البطوله

ابدويً تسكن براسه عشاير

ينذبح عادي و لا تعقر ذلوله

المراجل صنعته و الدم فاير

في حجاجينه مضامين الطفوله

في كرم كفه و مداته يعاير

لا طرى اسمه فالمجالس فسحوله

لا زهل له شيءً بأذن الله صاير

طيب هرجه ينتشر و الصدر توله

و أن تكلم يفرش الدنيا حراير

و ان سكت تذكروه و صفقوله

زايرين البيت بٌورك كل زاير

من رجال و من صغار و من كهوله

بشروا الترفه مجدلة الضفاير

سيدة ريح المطر سبة هطوله

قولوا انك ماأخذتها عن جداير

طلتي شيءً ما قدر غيرك يطوله

ساكنه قلبه ولا حولك ضراير

من بداية فهرسه لأخر فصوله

لولشي يا بنت فكاك الزراير

دام هذي فعلتك فأنتي مهوله

لك ضلوعي روض و كفوفي نواير

و انا عندي علم و اخذي يا بتوله

انا ليلي غم والا الهم ساير

من خلقنا الله وانا صوله و جوله

السنين مقٌفيه و الجرح غاير

و الوجيه من المواجيب مغسوله

ما نصلي الفجر بأوقات العصاير

هذا منا شيءً لا يمكن حصوله

و الاوادم تفخر بطول العماير

و البناء فنً قديم و له أصوله

كاتم اسرارك و تحسبها جهاير

عاقب الله قابل العيب و قبوله

ليبيا تحرص على آمن الجزاير

من طلع منها فلا يضمن دخوله

و القصايد مورقه و الدرب ناير

و المسافر ننتظر لحظة وصوله

و الشعر جبته بلا عسر و عزاير

و انا من صفوة اساميه و فحوله

مسرحيه و انتهت يا أهل الضماير

يا معافي عاف فاضل من فضوله

انتهينا و ابتدى أسدال الستاير

و الشعر حولي و انا مانيب حوله