بالله ياراعي المناقيد دعني

مانيب تاجر والقصايد بضاعة

حرام اعوَد واتبع اللي تبعني

وحرام اقول ازريت عقب استطاعة

سكت لين اونست صمتي وجعني

وجمال شعري زاد صمتي بشاعة

والشر سيفٍ ماقطعته .. قطعني

والخير في قلبي شعور وقناعة

والطيش ياما للمكاسب دفعني

والصبر في بعض المواقف دناعة

وإن قلت .. أنا باقول .. واقول واعني

بالقول طلت اللي يعسر الشجاعة

أنا نفعت الشعر لو مانفعني

ماخلف هذا الجوع غير المجاعة

شعري شعوري صانعه ماصنعني

الشعر عندي روح قبل الصناعة

عندي تساوى مدحهم لي ولعني

جمعٍ عسى مايجتمع له جماعة

كان النسب عن الردا مارفعني

ساويت في طيب النسب والوضاعة

وإن كان قلب اللي أحبه وسعني

ماهمني ضيق الزمن واتساعة