كن الهبايب يوم تمحا الخطاوي

عاشق بكفه يمسح دموع معشوق

والحزن عمره ما يبيّت خلاوي

ولا يرقد إلا مفترش عين مخلوق

ياورد علمني وش العطر ناوي

أوتدري أسكت(يمكن أنساه وأفوق)

وإن ما نبت بأطراف صوتي شكاوي

حاولت أسافر غيم وأعوّد بروق

وش عاد لو كثرت علي البلاوي؟؟

لاصار مالي بالغلا عندك حقوق

واللي نشد (وش فيه ناحل وذاوي؟)

مافيني إلا أني بعض طين وعروق

وأنا نعم ( للحين) شاعر هواوي

إن ظقت وإلا إن رقت جيتك بطاروق

وأموت إلى من شفت مشي الحياوي

رجل ٍ تهجّا الدرب وعيون ٍ تموق

وأحب نظرات العديم النداوي

لين ألتفت يقراك من فوق إلى فوق

وأذوب في دمعة عيون الخلاوي

والحب له في جبهة عروقي حروق

حبيبتي ماني حزين وشقاوي

لكن غدت ضحكاتي لفمي عقوق

حبيبتي والشوق ماله عراوي

ولا لطير العشق برقع ولا سبوق

حبيبتي وإن شفتي الحزن خاوي

فأنا خنقني البعد والبعد مخنوق

حبيبتي ماعاد فيها هقاوي

بيّن بياض الياس والصبر مشقوق

وإلا الهبايب لو تحنّ الخطاوي

ماكان أبد عاشق نسا وصل معشوق