والله وخطت شوارب جرحي الثاني

والجرح الأول نبت له لحيه وشابت

يا كلها شف بعضها وين وداني

ياظلها النوروجروحي متى طابت

من ينقل عتاب عدواني لخلاني

من ينزع الهم كانه بالصدر ثابت

يابنت جيت ألحق أعذارك ولا أمداني

والشمس ماتشرق إلا إن كانها غابت

طيب نقول الرعد خاين وخلاني

بس المزن عقب هالغيبات وش جابت

كان الخطا بأن أنا مانيب أحد ثاني

فأنا أعترف رميتك ياعاذلي صابت

ياليت بعض الحكي ماجا على لساني

أو ليتني ماهقيت الهقوه وخابت

واليوم لو أملك النسيان لأنساني

وأهز صملان عين بالبكا رابت

والله مأسأل من المجني من الجاني

لكن هي شموعنا تندم إذا ذابت

مدري أنا أكبر بكم دمعه من أحزاني

بس أدري بساعتي من عقربك هابت

والخوفه أنسا من اللي فيهم أشقاني

الحظ وإلا خفوق بالرجا سابت

من وين أنا جيت؟مدري! اسأل أوطاني

الظاهر أني مثل بعض الشجر نابت

والموت ياناس لوجرحي تعداني

والصالبه من ركيزات الصبر عابت

والله لأحلق شوارب جرحي الثاني

كان آخر أربع جروح من القهر شابت