لاعاش حب ٍ يسم الحال والعيشه

ولاعاش راس ٍ على طبع الردى رابي

ولو كل طير ٍ يهد إلى أنتهض ريشه

ماشفت من خالف الهقوه من أحبابي

أحد ٍ رضى بالعظم ويحب تعريشه

وأحد ٍ غرس بالشحم نابه مثل نابي

وإن غر طفل الحرير بنية الخيشه

باكر يجيه البراد ويذكر عتابي

وكم ضاع قلب ٍ يحب ومات من طيشه

وكم سطر محد ٍ قراه إلا انت بكتابي

وماكل رمش ٍ يغلبك لأنتخى جيشه

ولا كل زين ٍ تعلا ياصل إعجابي

أحد ٍ كفو ينعناله لو ورى بيشه

وأحد ٍ تثاقلت أجيه وهو ورى بابي

والمايق اللي طرى من جيت لعليشه

حسبي على البعد أخذ زوله من أهدابي

يابنت والصدر ضاق بكثر تنبيشه

والله مالك حياه تسرك إلابي

بعض المساكن ملاها الناس ووحيشه

وبعض المساكن خلا وإن جيت هلابي

وكم هم ماله دوى ياكود تطنيشه

وكم هم غنيته البارح وغنابي

وللموت حب ٍ رجاه يكدر العيشه

وللقطع راس ٍ على شحذ الغلا رابي