ياصاحبي جيتك اشكيلك من أحوالي

جيت ومادامك رفيقي ليه أطوّلها

العلم وما فيه يا أول وآخر أمالي

عندي رساله ولا ادري كيف أوصلها

للي سبتني وأنا من قبلها سالي

أبيك توقف معي .. وتروح وتسألها

وش فيها تفتح علي أبواب عذالي

وتحمّل النفس حاجه ما تحملها

وش فيها رغم الوفا تتركني لحالي

وأنا لجفاها تركت الدنيا بأكملها

إن كان هذا زعل .. علمها يالغالي

ما كان قصدي ورب البيت ازعلها

علمها واللي يخلي قلبك الخالي

عن ضيقتي وين وصلت من تجاهلها

علمها كم لي وأنا ماشلت جوالي

كله علشان ما اقلب رسايلها

وعلمها وشلون لامرت على بالي

أروح وأضم صورتها واقبلها

وعلمها كيف انشغل عن كثرة أشغالي

واسرح واغمض عيوني واتخيلها

علمها عني وعن همي وغربالي

علمها عن كل حاجه في تجهلها

وان شفتها دنقت تبكي على حالي

انسى الكلام وتذكر كلمه وقلها

قل شاعرك يعتذر ويعاهدك تالي

انه يرتب حساباته من أولها

ويقول حتى القصيد اللي على بالي

والله ماعاد اكتبه كانه يزعلها