الصدور بحور والقلب مثل الغابه

كل قلب يجتمع فيه حقد وطيبه

والحكي عاري جسد والسكوت ثيابه

والتسرع مهزله والركاده هيبه

والخطايا تختلف والعذر متشابه

مير لاصار الوفا هو خطاك..مصيبه

الوفا مع بعض الأشخاص مابه ثابه

ياولد مع بعض الأشخاص لاتصخي به

واحد ماتفقده لو يطول غيابه

غير من لو هو معك قلت وين الغيبه

وواحد تزعل من الطاري اللي جابه

غير من تفرح بطاريه وتهذري به

كل ليل جيت اراضيه راح طلابه

لين انام براحته واسهر بتعذيبه

أصدق أشكال الحزن ضحكةٍ كذابه

وأسهل أشكال الفرح دمعتين صعيبه

وأصعب الحزن الذي ماتعرف أسبابه

هو سؤال شك والا جوابه ريبه

وأغرب الشوق الذي مانعرف أحبابه

ماسك خيط النوى والهوى يومي به

آه ياليت القصايد ورق وكتابه

ليت ماهي نور وشعور حلم وخيبه