اللي تعب واسترحنا نتعب ويستريح

قل للتعب يبشر بسيلٍ يهوله عدد

اليوم اذا يبسن الأرياق يبسن صحيح

ياضيق الاثنين للمستبشرين الاحد

الدمع يسبقه باقيه انحدار ومطيح

فاللي نزل من مدامعنا علينا صعد

مات الكريم الحيي المستقيم الصريح

اشجع هل الارض واخوفهم متى ماسجد

لولا المنايا منايا كان شفت الطريح

أي الصدوقين واوفاهم وعيد ووعد

لاشك ربه كتب ماللمنايا نطيح

نفنى ولا دايم الا وجه واحد احد

يارب كانه ستر نفس وحفظ عرض زيح

عن وجهه النار واغسله بسحابة برد

أنت الكريم وتحب من الوجيه الفليح

بشر من احسن بك الظن بدروب السعد

عز الله انه عدل فينا عسى الله يبيح

له ويغفر ذنبه ويجزيه عنا رغد

عف وعفى واصلح وجاهد وصان المليح

ولافارق اجر الصواب اجره على ماجتهد

ياحي الافعال من مسك وقرنفل وشيح

لاطاب طيبك ولا سوى سواياك احد

في الميتين الرثا يكتب وفيك المديح

يكمل مديحه بوصفك ياعظيم البلد

جمع البخاري ومسلم للحديث الصحيح

جمعك صحاح الشيم والطيب متن وسند

خمس وثمانين عام وكون صدرك فسيح

قل يعقب من نكر فضل يهبا من جحد

والفرق بعد المهد يظهر وقبل الضريح

يافارقٍ فالضريح وفارق ٍ فالمهد

من استطاع السبيل وحج فرضه يطيح

ومن طاح فرضه رجع شايل جمايل فهد

ماهبت الريح تبقى وانت لا هب ريح

اعف الالسن جميع واكرم هل الارض يد

لوماتسمى ملك ماظن ربي يتيح

هذا الاسم للبشر من قبل ولا بعد

وقت الرخا يكثرون اهل اللسان الفصيح

يا افصح الناس لاضاقت وعز السند

ان كان فيما كتب خادمك ضي ٍ شحيح

ياسيدي فاللسان من المصاب انعقد

واللي جهل في حضورك علم الامر القبيح

تعلم ف غيبتك جهل الصبر والجلد

وهو بس اناللي ضلوعه من دموعه تسيح

المملكة والعرب والمسلمين وبعد

يالله بصبر بلا سلوان يشفي جريح

سلوان مثلك ماهو حاصل ولا اطلبه ابد

ياوالدي كل عرق من عروقي يصيح

يامكرمك والد يابخل بخلي ولد

مرثية الملك فهد بن عبدالعزيز آل سعود