يا عين كنّ الدمع ماعنه مجناب

ولا كل رجال ٍ فقدناه نبكيه !

تغورقي بالملح والملح لا ذاب

المحجّر اللي جفّ بسيل واديه !

وان كان حرّ الدمع ماجرّح اهداب

ليه البُكا والحزن يا مدمعي ليه ؟

ذيب الشقا يقنب على راس مرقاب

يا مصبّرين القلب في موت غاليه

الموت نرضابه بلا شرح واسباب

نرضى بحكم الله ونصبر وندعيه :

يغفر ذنوب الفيصلي ( ستر وحجاب

أمة محمد ) دون شي ٍ تحاتيه ؟!

يا ( نجد ) عم الحزن وديان وهضاب

ويا ( حجاز ) كل جبالك اليوم تنعيه

و ( حايل ) كست سلمى من الهم جلباب

و ( عرعر ) حكت حزن الشمال ومعانيه

و ( نجران ) من زود العنا تفتح كتاب

حزن الجنوب وتنقل اصدق تعازيه

وهلّ ( الخليج ) الدمع في راس مشعاب

و ( البحر الاحمر ) كن جده تواسيه

وياكويت حزنك غير ! ومصابك مصاب

في موت من حرّر قيودك بأياديه

اللي فتح للفزعه بيوت وابواب

ولعيون ارض الخير غامر باراضيه

وانا مابين الحيره وفقد الاعصاب

عجزت لا اكتب بيت واحد واغنيه !

كني من البارح من الشعر مرتاب

شاعر وفاقدله وطن كيف يرثيه ؟

ماهي بلحية تعزية شعب واقراب

لا والله الا كل مسلم نعزيه

هذا مليك المجد فكاك الانشاب

يا قرب فزعاته ومبعد هقاويه

علّ السحاب يهلّ من آب لا آب

على قبر فهد الجزيره ويسقيه

اللي مرض وقلوبنا حوله اسراب

ومات ودعاوينا لربه تخاويه

وسع حرم / طبع كتب / حارب ارهاب

ومكه وطيبه تفتخر في مساعيه

مثله يغيّبه القدر مير ما غاب

ومثله يموت ولا يموت الفخر فيه

يا كثر من راحوا مع الوقت غيّاب

ويا قل من باقي على الارض طاريه

سجل يا تاريخ الشرف صفحة اعجاب

للي يعيش الحاضر بخير ماضيه

وللمرجله موقف وللنار شبّاب

وللحكم ابو متعب وابايع ويكفيه :

من قبل تُعلن بيعته بين الاقطاب

قامت تبايعه القلوب وتزكيه

والجمله اللي ماهي بحاجة اعراب :

ماكل رجال ٍ فقدناه نبكيه