بانت نجوم الصبح واللي في عيوني من عصر

ماهوب دمعن لاتضايقت أتنهت وأسكبه

لاوالله ألا حلم رجلن عن طموحه ماقصر

لو قصرة سود الليالي من يمينه وشنبه

وانا لوني ماتعلمت الهزيمه والنصر

ماكان ذقت من الهوى القتال أمره وأعذبه

شاعر وعصري فاتني وعيش في أغرب عصر

للوقت وقتي والزمن مابيني وبينه شبه

لكن هنوفٍ مثّلت دور العزيزه في مصر

قدّت قميصي وأسرفت في وصلها قبل أنتبه

يوم أنتبهت أستشهدت ضدي بحراس وقصر

قلت أرحمي عزيز قومن ذل ورخا منكبه

ماني نبي الله أقاوم حسن خصرك لنحصر

انا بشر عبدن ضعيف وكل برقن يجذبه

قالت وهي توي تثنى كن مافيها خصر

الشعر ياضيدان ورث أجدود والا موهبه

قلت الشعر سحرن يصخرلي قلوب ويختصر

عمر المسافات الطويله والسنين المجدبه

والشعر لو حصرته في ضلوعي مانحصر

يطغى على حدب المحاني لين ابيحه واكتبه

وان علمتني الفاتنه وشلون أسير أبلا بصر

علمتها الفجال وشلون أتحدى وأشربه

وعلمتها اني كذا طال الزمن والاقصر

وان عذب الحب أصدقه وان عذب الشعر أكذبه