في دربكم يا راحلين منا كيف

تالي ليال القيظ وأول خريفه

ردو سلام أهل القلوب المواليف

على الوليف اللي نشد عن وليفه

ردوه لعذوق النخيل المهانيف

وعلى القصور اللي بوادي حنيفة

دارٍ لها بالقلب عشق وتكاليف

يا عل عينٍ ما هوتها كفيفة

طبنا وشبنا واتعبتنا المشاريف

والمرقب العالي هبوبه عنيفة

يا واردين العد كفوا المغاريف

اللي بقى دمعٍ هماجٍ ذريفه

والله لو دمي يغيث الملاهيف

قطعت عرقي لين يصفى نزيفه

يا حظ من لا عرف منهو ولا شيف

إن طاب يحمد وان تردى بكيفه

وحنا ورثنا العز عظم وغضاريف

لا ما ورثنا العز تاج وقطيفة