انا لولا الغلا هو والمحبه والعيون السود

ماجيتك من قصاي وقلت لك عاشق يا مغتره

وانا احبك ومن قلبي احب وماني بمحدود

ولو اني ما احبك كان ليه ازعل واتشره

تمايلتي زعل ولا تثنيتي يا غصن العود

انا ما ارخصك لو انك تزعلتي ميه مره

تعدي للسحاب وخذي النجمه من العنقود

وخلي للسهر غير الدموع صدور مستره

وخلي للحرير الي على متنك لاهبت نود

مساحه يكسي الارض بجديله والسما غره

تمشي بين صفحات الوجيه البيض ولا السود

وتسامي لين ما يبقى بحسادك ولا ذره

تعدي كل من يرجي التفاتاتك بكل برود

وخليهم مباليق العيون وجيه مفتره

ابيك بكل ما ربي عطاك من الحلا والزود

وابي كلك وابي قلبك وابي خيره وابي شره

قضى عمري وانا واقف على باب الرجا الموصود

واخاف اني ما عاد اقدر اصبر نفسي الحره

غيابك لعنبو هذا الغايب اللي ما منه فود

كسر حجر الضلوع وضيق الخاطر ولا سره

طلبتك لا تخلين العواذل تكثر المنقود

انا مضطر وطباع العواذل حيل مضطره