صدري وأنا حُر فيه
عايز أرسم خنجر
على صدري.
خنجر طويل
مسنون
مشرشر
 ببوز مكَّار  ورفيع
ومقبض عاج
من النوع الكِشَرى
اللى مبيضحكش
للرغيف السخن.
أو أرسم
أسد.
أسد كبير
بشعر منفوش
وعيون غِلَّاوية  وحمرا
وأنياب متمرسة على غدر الدنيا
والوقفة فى وش الناس.
وممكن
أرسم
أسد
أسد شايل خنجر
وأنا شايلهم، هُمَّا الاتنين
شايلهم على صدرى
وممكن كمان
أرسم ست
ست ست يعني
بقلب حنين
وتفاصيل سخنة
وشفايف مزهرة
تخاف عليّا
من النسمة
وتخاف عليّا
من الأسد
وتخوِّفني
عند اللزوم.
وارسم كمان
بيت صغير
حواليه جنينة
وسور أبيض
وبنت سمرا
مسيِّبة شعرها
بتلعب على مرجيحة
وولد أصغر منها
بيلعب بكورة
يشوطها ف لمبة المدخل
تتكسّر ميت حتة
بس ماحدش يضربه
عايز أرسم
على صدرى
ست
وبنت
وولد
وبيت صغير
واحضنهم كل ليلة
وأنام
.
مبسوط