لا جيت لك في مجلس فيه مغتاب

سوالفه خلف المقفى شنيعه

اما ابذل لتغييرت المنكر اسباب

دافع عن الطيب بما تستطيعه

والا اخذ لك فنجال واخرج مع الباب

نزه جنابك وارض ربي وسيعه

هل تعلم ان اهل التنابز بالالقاب

بين الاخوان يسببون القطيعه

والناقص اللي للعراقيب شذاب

غير جبل ولا تغير طبيعه

تلقاه نمام لا ودى ولا جاب

وان صار له فرصه خذاها ذريعه

والا حسود مفترى والا كذاب

ما يعجبه صيف الزمان وربيعه

لا عجز عن وقفات عطران الاشناب

اهل الفعايل والنفوس الرفيعه

جالس عسى الله يكرم السامع اذناب

زلايب تستقبل اللي يذيعه

وطعن وعذرب في الاسامي ولنساب

وحاول يحط بكل طيب هزيعه

ما يدري ان ما دون عين الله حجاب

وصكات دورات الليالي سريعه

الحق يأتي له بعد حين طلاب

اليوم والا الصبح والا تبيعه

والرابح اللي لا ذكر زلته تاب

لا خالف سلوم ولا خالف شريعه