يا بدر حاجي تمشور قبالي

وتعرم وتشمخ بهالعالي

لما كنت متلك ابن عشرين

عالدرب كنت خانق خيالي

وكانت حياتي عجقة حساسين

ولولا شربت الكاس بيحلالي

واليوم متل المن تمان سنين

عجزان عن دفع الكنبيالي

الله يهدك يا هوى تشرين

الهديتني وحطمت امالي

مبارح كنت اضحك على الحلوين

واليوم عم اضحك على حالي

لا لا غلط من قال عني مين

اني انا مصفي بهالحالي

روحوا اسالوا ال بالحب فهمانين

الي بيخطرو كل يوم على بالي

روحو اسالو شيبة جبل صنين

بتقلكن حب الكبر غالي

مبارح انا يعني انا المسكين

صدفة التقيت بعين قتالي

جدايلها مشالح من كوانين

التفو عازهرة خصر ميالي

وعيون نص بنص دبلانين

والجفن اكحل والدمع غالي

وقفنا وصرنا من عدا تلحين

موالها يفهم عا موالي

وبالسر صرنا نكتب عناوين

نودي رسالي وناخد رسالي

وما بين صفنه وبين رقة ولين

قالت اتركني مالك ومالي

الشعار انتو ناس كدابين

بتغازلونا وقلبكم خالي

وشو قصتك يا بو علي تخمين

ناسي مزوج يا ابن خالي ؟

قلتلها بشرع الدني والدين

لا تأخديني لو اخدت اتنين

هيدي شريعة كل متوالي