بس تعلّمنا نلوم الدمع وشراع السفينه

ونتجاهل لعبة الأحلام واسباب الجراح

علميني وش يريد الشوك يالوردة الحزينه

اكثر من اني بلعت الضيم وبحجة مزاح

كل ما اوجستي وجع قلبي وقلتي لي هوينه

تصفر ظلوعي مثل زلن تعاتبه الرياح

امهليني اقهر العبره وقولي الْله يعينه

هالمحارب من محطة ليا محطة ولا استراح

واتركيني اسعى يم الرزق مليت السكينه

في زمان الجوع الاغبر تصبح اللقمة سلاح

واعذريني ما تركت لأصبعك دبله ثمينه

وعذري اقبح من ذنوبن مايجملها السماح

ولاقدرت اجمع لك العش الصغير اللي تبينه

ياحمامه علمت قلبي تراتيل النواح

بكره ترميني المواني.. مدري وين بأي مدينه

وانا ياصبح امنياتي طير مكسور الجناح

مدري باكر وش اقول لطلة الفجر الطعينه

لاصحا عصفور حلمي ومالقى قمح الصباح

اه ياحلمن خذلته ماقدرت اصل يدينه

لين شفته سبل عيونه عن عيوني وطاح

الوداع ولابقى غير التباعد والغبينه

وعمرٍ يعاتب كفوفٍ طولت ترجى القراح

وان سألك الدمع بالليل البهيم وقال وينه

ومابقى للصبر في قلبك على الشده براح

قولي راح.. وكان حلمه..كل حلمه..ياسمينه

راح مطحون برحى الايام ذرته الرياح

راح يستجمع شتاته صبره يعزي حنينه

فارسٍ خانه جواد الحلم وادمته الرماح

أنتصرنا بالبدايه كنّا نحَسبها هوينه

وانهزمنا وكل شي بصحوة الاوهام راح

مثلنا حتى يعيش /وتلمح الاحلام عينه

يبتدي عمره كفاح وينتهي عمره كفاح