هاك كل القصايد هاك واقريهن

لا تقولين ش اخرهن وش اولهن

كلهن فدوةٍ لك هالك قوليهن

في لسانك ترى لسانك يجملهن

غيبتك أثرت في حال راعين

قطعة أيام عيّا لا يتحملهن

بس يمكن ثلاث ايام غبتيهن

لعنبوها لثلاث ايام ما اطولهن

طالعي في فعايلهن وشوفيهن

تحت عيني تبين لك فعايلهن

ما هقيت اني اسلم من بلاويهن

بهذلنّي جعل ربي يبهذلهن

وتهت حتى القصايد قمت اعنيهن

يكملن وانسى واعوّد واكمّلهن

والمعاني غريبه!!.. قمت برجليهن

باتشرّط عليهن وآخذ اجملهن

اتركي هالثلاث ارجوك خليهن

سولفي باي حاجه بنتجاهلهن

انسي ايامهن وانسي لياليهن

همّليهن وانا مثلك باهمّلهن

لا تجيبين سيرتهن وطاريهن

انزعج حيل لاقمت آتخيلهن