احضنيني
يا ضواحي برشلونة
واعزفي
روح الموسيقى
والخلود الابدي
واغسليني
بشوق روحك
ذوبيني
بسحر بوحك
ونامي لحظه
في يدي
اقسميني ..
ولا اقول لك
اكرميني دام ظلك
واجمعي
العذراء
مع برج الجدي
وانزلي
مثل المطر
في حذر
وانثريني
بساحة الحب الكبير
وعاندي
الحظ الردي
وانسجي
ثوب البنفسج
حتى لو يطلع قصير ..
علمي الدمعه
تطير ..
بكره تفرج
ونلتقي
بـ اللي نبي
واحرسي
بجنحان روحك
ما تبقى
من نزيف
الروح عندي احرسي
وارمسي ..
يا وله .. ما ينسي
يا ندى الصبح
الالاهي
لعرش قيصر
اهمسي
وعبري بوضوح زايد
لانفعالات القصايد
و لـ انتصاري ارقصي
واحرصي
يا توت قلبي
لا نضيع
ولا نودع بعضنا
ولا نخاف من الاماني
ولا عواصف ضعفنا
اللي لفت هــ المسا
ما بقى
في برشلونة
غير ذكرى
اشغلتني ..
وعطرها .. ما ينسى