انا هـواي جويـدل دلهـا زيـن

تلعب وتضحك والمبيسم ذبوحـي

حبيتها حب الشـرف للشريفيـن

قلبي عليها مثـل ورع شفوحـي

ورع يذاود عبرته والدهر شيـن

البيت خالي والرعايـا سروحـي

وجدي عليها وجد من حده الديـن

قليل مـال ولا المديـن سموحـي

او وجد من جاروا عليه السلاطين

بالسجن مضيوم قليـل الشبوحـي

او وجد عود واصل عمر تسعيـن

ماتوا عياله والقريـب شحوحـي

او وجد عذرى زوجوها مسيكيـن

تبغى الفراق وكل يومن طموحـي

بليت بعفش مايعـرف القوانيـن

وجهه كريه وبالعطايـا شحوحـي

ياليت عمري ياعرب وقم عشرين

والحق هوى بالي واداوي جروحي

فيما مضى نمشي بروض وبساتين

يرقص لنا غصن الهوى بالمزوحي

واليوم في بيتي كسير الجناحيـن

عاجز وشيبي في الصوابر يلوحي

امسي بهم ويصبح الهـم هميـن

هـم يراودنـي وهـم يـروحـي

يالله ياغافـر ذنـوب المصلـيـن

ياواحدن تدري بحالـي وتوحـي

تغفر ذنوبي يوم عرض الموازين

وانت اللذي لذنوب عبدك دموحي