انتي بشر ولا ملاك .. الا ملاك الا بشر

انتي حقيقة ياترى او ياترى ولا خيال ؟

انتي جنون الشعر وانتي كل رنات السمر

انتي حلال الا حرام . الا أجمل ذنوب الحلال

انتي ملذات السهر ريحانة القلب الخضر

انتي موسيقى ترسم الضحكة على وجه الليال

قبل اكحل عيوني بشوفك كنت رجل معتبر

ثم ضعت ف الطوشة كذا ياهملال ياهملال

ميلي كذا هزي كذا والقلب مع خصرك نفر

يميل مع جسمك يمين يميل مع جسمك شمال

ياما احتوى التوب المشجر تحت ازاريرة ثمر

وابوك يا اللويست الأسود كيف قاومت الثقال ؟

لبيه لا اقبلتي ويالبيه لا اعطيتي ظهر

ياجعلنا خشرة يابو غمازتين ودق خال

غرد يابو نورة فديت غناك ثم شد الوتر

انا اشهد اني فوق هام السحب وانا اخو العيال

تكفين قومي وادفري بالورك صدام الفجر

خليني اعيش بجمالك من خلال ومن خلال

سلسالك الفضي كلاه العنق واطغاه النحر

ثم طاح بين اليوسفنديات وأحرقه الجمال

هو ذا صدر هو ذي فواكة ناضجة هو ذا قبر

ويلي على شوفه هلي لحظات قبل الأغتيال

ياجعلني فدوة قوام هش .. وعلوه بدر

مع مضحك يطغى به الفوشي على لون الآل

عقالي المرعز مقاس الخصر لامنه انهصر

وماله مجال يطيح تحت الخصر لو فل العقال

تفتلي مع صوت ابو نورة ونسينا الفقر

تراني الليلة ما أقيش بالوليد بن طلال

بنجتي اعصابي وقمت اهذي معاك بلا فكر

الأمير نايف لو سجني سيدي حكمة عدال

دويت مع ريش النعام اللي تبعثر وانتثر

خليه ياخذ ثار حوا من مداغيش الرجال

سرحت مع سود العيون اللي تكحل بالسحر

والرمش يقنص للخدود وتاق طلعه للهلال

وغديت مع زين المحاسن تيه والله يغفر

آمنت باللي صورك بالحسن رهبه وابتهال

ياغند ياكل الدلع يامكس من بدو وحضر

ياسيدة كل القلوب اللي تلفت بالكمال

تفتلي طيش وكبر .. تغنجي طيش وكبر

يحق لك وانا تراه يحق لي في كل حال

لأني بشر وأزل والخلاق يغفر للبشر

يابري جيبي لأنتهى ذا الليل ثم عشتك خيال