وتخايلو ضيعه بجنوب لبنان
غافيه والصبح عم يطلع
وعنقود صهيوني يجي شعلان
يفرفط حبوبو فوقها وتولع
وع الستالايت رجال أمريكان
تكبّس زرار.. تحوس.. تطّلّع
وم تشوف إلا قْنابل ودخّان
وأجساد تتمزق وتتشلّع
وكترة ماشربت دم طاهر كان
ودفنت ضحك أطفال بالموقع
امتص العشب قدسيّة الأكفان
وصار يشعر ويبكي ويتوجّع
*
قانا القداسه منبت الوجدان
هيي أساس النهر والمنبع
يسوع فيها بارك العرسان
وريحة قميصو زعتر ونعنع
والفرق بين الكفر والإيمان
إنو ع قانا العم بتتوجّع
نحنا منجي بمْصاحف وصلبان
وهنّي بيجو بالنار والمدفع
*
ياأولبرايت لاتحقّرو الإنسان
لمّا الزمان بيجبرو يركع
انتبهو في عشبه بتنبت بلبنان
الورقه رفيعه والخصر أرفع
منحدل عليها الزفت بالأطنان
ومنقول راحت مابقى ترجع
ولمابيسري بدمّها نيسان
بتشقّ زفت الدرب وبتطلع