صاح النذير وهجن الاشجان بتغير

مرابع القلب الحزين تغزيها

غبيت عصير في عجاج التفاكير

واذن وبارود السهر مغتشيها

هجن مدهلها على الغارة عصير

هم ن على عوج الضلوع يحديها

ينهب مجاهيم ويهدي مغاتير

يا اللي فطين سمها وانت ابيها

يالله لا ضاقت صدور المناعير

انك بطول الهم لاتبتليها

ويالله لا تخلي بيوت المسافير

ارب لاضاق السنافي يجيها

تشعفني الغيمة ويشجني الطير

والارض ماكن ودي امشي عليها

وفي عيني الدنيا قليل من كثير

جرادة من صادها يشتويها

وللناس وجهتهم وانا وجهتي غير

ولكل حي هواية يهتويها

والايام ممزوج صفاها بتكدير

والله كريم ورحمته مرتجيها

وانا صبور وقانع بالمقادير

ومتوقع ساعة فرج واحتريها

ورزقي على الله يوم بعض المدابير

كرامته حفنة ورق تشتريها

حلفت مارد والخلايق مصادير

ولو لقمتي بتذلني ما اشتهيها

ناس على ما بهش مثل العصافير

وناس عطاها الله وجعل يهنيها

ولكن من التجار كم من عثيبير

قد غسلت منه المروة يديها

وكم من فقير مدهل للمسايير

عز القصير ولابته بيحميها

اكن للطيب معزة وتقدير

واذكر هل الطولات واشير إليها

وقالوا تحذ الخيل من جبهة العير

امدح بها ناس وناس اهجيها

ياصاحبي جار الدهر والله مجير

ومن كتب له خطوة بيخطيها

لاجش لي ممن يحبه مقاصير

حاول ينزل هامته ويحنيها

وحاول يدور للقصور أي تبرير

وما دامها حوله يبي يحتويها

تقدر تقول أزمة وعدت على خير

وخرجت من دوامة كنت فيها

وتقدر تقول أنها زوابع وأعاصير

وقفت وأعلنت انتصاري عليها