يامقلّد ارقاب ( الخـ.....) درّك

ضيّعت درك في رقاب (الخـ......)

بذلت مجهودك بما لايسرّك

ولالك حصيل الا التعب والمخاسير

اسمع نصيحة من بنصحه يبرّك

واقنع وفكّر فى الذي صار ويصير

زمل التخوت بوزنة الكيل برّك

وشلون عاد مقنطرات القناطير

والظل قام مع الهبوب يتحرّك

والشجره الدوفا كلتها العصافير

دبّ الدبا فى القاع والضلع ورّك

وفى العيلمي يبست شفايا الحدادير

والبذر عوّد بالسماري يفرّك

عقب ازرت تحرث الصفاه المحافير

لكن حذرا عقب هاذي يغرّك

براق صيفٍ شتّتته المعاصير

اصبر ولاتشكي على الناس ضرّك

شكوىً على غير الولي مابها خير

خل الضعيّف بالضعيف يتبرّك

وارج القوي مجرى الفلك والمقادير

وقل ياعسى يانجد صحصاح برّك

يسقيه رب العرش من غير تكدير

سقياً لواديك وجبلك ومقرّك

تجعلك جناتٍ وغابات ازاهير

حيث ان ممشاً مع برادك وحرّك

يسوى القصور وعاليات المقاصير

ولادلّه اللي ذاق حلوك ومرّك

الاّ عذاك ليا اقلقته التفاكير

لله درّك دار لله درّك

لعلنا بك ماندوّر بدل غير