متهم
الشعب كله
بالفشل
في الوصول
وتقفل
باب الحلول
وانقتل فينا
النضال
والنزول
أسرع ما يمكن
يعني قول
لا ما فيش
إصلاح حقيقي
لأ ما فيش
كلمة حتي
تبلِّ ريقي
لجل أعيش
أو مجرد
احتمال
إننا نبدأ
نعيش
إننا نصعد
لـ فوق
طول
ما بتزيد الفروق
وضعنا لازم يسوء
واللي فوق
هـ يتنو فوق
واللي تحت
يتنو ينزل
يختفي
تحت الرمال
واللي عايش
بالحلال
مش هـ يلقي
ليه مكان
مش ح يبقي
حد حر
في اختيار
كل لحظة
عليه تمر
عيشته نار
يبقي طعم
حياته مُرْ
ليل.. نهار
كل ما يعطش
يقوم
يشرب ويأكل
م الهموم
باختصار
يختفي تحت
الهدوم
لما تلقاه راح
وزال،
والسؤال..
لو حقيقي
الشمس طالعة
ولاّ نور
حد شمعة
والأمل..
ليه تاني رجعة
ليه حداد
الهم طال..؟
ليه صحيحنا
في يوم مرض..؟
ليه حصارنا
بـ يتفرض..؟
ليه ماضينا
بـ ينقرض
لمّا قرب
ع الزوال..؟
لما يجمعنا
لئيم..
كل كلمة
سين وجيم
يبقي عايشين
في نعيم
ولا عايشين
ف احتلال
لو أنا غلطان
في فهم
ولا عايش
وحدي وهم
كدبة جوايا
وخيال
نوروني..
فهموني،
واضربوا لي
عليه مثال
يعني قصدك
إيه يا عم..؟
ما كفياك
أحزان وغم
يعني لم
بقي وعيش
ولا ناوي
تقول ما فيش
للوجود
أصلا مجال
ما كفياك
حزن وكآبة
وارحم
الناس الغلابة
أنت جاي
تدي إجابة
ولا تطرح
ميت سؤال..؟
اعذروني
ليا عذري
الحياة سوده
ف عنيّا
وانحني
م اليأس ضهري
يا ما شال
م الحزن ميه
صنفوني
إني فقري
الحكاية
هيه.. هيه
حد ينكر
إننا بعنا القضية
من زمان
والبلاد..
سبناها لعبة
لليهود والأمريكان
والسجون صبحت
ملانة أبْرِيَا
والأمانة
والتدين
في الزمن أصبح
بلاء
والحياء بقي عيب
وشوفنا الوقاحة
بقت رسالة
والتفاهة تبقي فن
شيء صحيح
فعلا يجن
غيروا كل القيم
لبسوا
الحق الضلال
والضلال
ما بقاش أذي
بقي مثل
بيه يحتذي
ينضرب بيه
المثال،
والأمل..
بقي مسرحية..
تمثلية..
كل أبطالها
خيال،
والمصير
بقي في ايد عميل
باع بلاده لاحتلال
و الجبان
أصبح بطل
والبطل..
هوَ اللي خان
كل ده
شيء مش
غريب..؟
هو ده نهج
الحبيب..؟
والرسالة
اللي نزلت
م السماء
قولوا..
فلتحيا العدالة
واضحكوا،
وارضوا البلاء.
لو حقيقي
دي الرسالة
إحنا مش
عايزين رسل
في الخرافة
والرذالة
كلنا نبقي انبياء
مبعوثين
نحيي الضلالة
بعد عصر
من الرخاء
يا ما شاء الله
عليكم..
الغباء..
أصبح ذكاء..!
ما كفياكم
ارحمونا
ما تقولوش
انه ابتلاء..
دا الحرام
في البطن شونة
من المعونة
اللي مخلوطة بدماء
من ضحايا المسلمين
والعرب والأبرياء
بس أقولك إيه؟
حرام
مستحيل ده
يكون سلام
واللي داق
الظلم شاف
م العذاب ألوان
وفاق
مستحيل يرجع
يخاف أو ينام
و الموت خلاص
فوق الكتاف
ما انتهينا
واندفنا كلنا
تحت التراب
السنين حنضل
وشلنا
عارنا محمول
ع الرقاب
والخراب
في بلدنا زاد
وأنت جاي
بتقولي قال
هيه ناقصة
إسوداد
مالها أحوال
البلاد
أنت عايز
بس تنقد
ما الأمور
ماشية وعال
مش هـ أقولك
ع الفساد
شايفه بعيونها
الرجال
مش ح أقولك
أي حاجة
أصله مش
زمن الشهادة
ايوة مش
زمن القتال
واللسان
حب السكوت
والخراب
دخل البيوت
والحقوق
لما تموت
مش جريمة
اغتيال..؟!
***