تمر ليلة الغربه وتسهر العين

ويظل جفن الجرح للصبح گاعد

شَنَـيِّم؟ چم جرح لو ردت الولي؟

كثره اجروح مو بس جرح واحد

أتگلب على جمر المواويل

ومن دمّ الجرح أكتب قصايد

أعزف عالضلع نغمات الفراگ

وارسم على اخدودي الدمع شاهد

تلوج الدنيه كلها ابلوجة الروح

وعلى اضلوع الزمان الهم يطارد

گصه بيَّه الألم.. چا مني شيريد؟

وصل حدّ الحزن؟ لو بعد رايد؟

أنا شايل ابصدري صبر أيوب

وحزن يعگوب وآلام الشدايد

هظيمه اعله البواچي اتفزز الليل

وهظيمه النوم من افراشه شارد

ويمر ريح الهوه چن دگة الباب

أگول العيد اجه وهسه اعايد

وارد احضن العيد ابگاع بغداد

وعلى دجله وأبو النواس أواعد

وتبقه يا عراق اللحن والعود

وأضل آنه الوتر واعزف قصايد