يمر بينه الحزن ضيف وانداريه
ونفرشله الجرح من جور الأيام
ومن هم الجِره اعلينه نلوليهْ
وبلچن من نلولي ابراحته اينام
لوليت وبچيت وگمت أحاچيه
أثاري الجرح يكبر لون ينلام
الجرح ما أدري بيه اشبيه ما بيه
الجرح خزّن ويسعر بالچبد گام
أثاري الجرح جرح الوكت ماذيه
وجرح الناس وي صرخات الأيتام
گصه التكفير بينه ومن فتاويه
ذبح الاسلام كله باسم الإسلام
نطيته العمر كله وبعد شنطيه
ذبح بيّه الأمل وأحلام الأحلام
جرح الوطن يكبر خايف اعليه
اخاف النوب فوگ الجرح ينضام
ما مش ناس
وينك يا إلاه الناس
ما مش ناس
ما مش ناس
ظلمه والضمير بلا رحم ينداس
يصرخ دمّ الحديثات
تصرخ حنّة العريس
يخنگنه ألف كابوس
يخنگنه ألف خناس
ما مش ناس
سهرانه الجروح وما تريد اتنام
نايم بالعيون امخزّن الفرگاس
اتفزّ اجروح روحي من اصيحن آه
لئن سوط الظلم بس يضرب اعله الراس
ما مش ناس.. ما مش ناس
علامات الشوارع ريحة الكافور
گاعد عالرصيف الموت
على طول الشباب امحضّر المقياس
ما مش ناس.. ما مش ناس
بس صوت الهظيمه اعله الشباب الراح
اشحال الوالده من الولد تگطع ياس
ما مش ناس.. ما مش ناس
بس صوت الأرامل يصرخ ابهلليل
وچفوف اليتامه اتريد عطف الناس
ما مش ناس.. ما مش ناس
يا ناس؟! الذي ذبحَو رضيع احسين
ومن شافو وفه العباس
شالو غيظهم چي لن وفه العباس
أحلف يا إلاه الناس
ما مش ناس.. ما مش ناس