احاول اكتب:
احاول استرجع كلام ٍ قالته
او غمامٍ سالته:
وارتب الأوراق..واكتب:
أحاول اكتبها قصيدٍ
ما حصل مره وكتبته
وارتكبها
مثل ذنب ٍعمرى ما يوم
ارتكبته
واستدرج الحزن الطرى
حتى تغرورق يديني
او حتى ييبس..دفترى
واحاول اكتب :
من زمان
من ثمان سنين
واكثر من عشر طعنات
واطول من سهر فارع .. تشجر ف الورق
واورق هوس ف البال
من هناك:
من اول الغيث اللى يسقى جبهتك
لامن خجلتى
لاخر اخر..رنة الخلخال
من هنا:
من يمين الممكن العادي
الين اقصى يسارك يا المحال
من ثلاثين..مضت
مدرى وشلون انقضت
للـ ..ليله اللى ذوبت
كل الثلاثين بشفاهك
ومدت الفنجال
من عرفتك كنت احاول
من عرفت الشعر احاول
واطول اقصر
وانكسر واختال
قريت من (بانت سعاد)
الين ما (فات المعاد)
حرف حرف
وكلمه كلمه
وبيت بيت
يمكن القى فيها ما يوصف شعوري
صدقينى ما لقيت
صدقينى: ما قدرت اكتب ولا اشطب
ولا قدرت اكذب
ولا حتى قدرت احتال
وش كثر هالعجز موجع
وش كثر هالعشق موجع
وش كثر هالشعر موجع
وش كثر: هذا المدى ضيق
ومعتم
اووف .. وشى ما ينقال
قمت افتش فى الكلام العذب
عن ملحٍ
وفى المالح من الهرج
عن صمتٍ زلال
ما لقيت إلاّالبقايا
ولا فقدت إلاّ .. ((طلال))