يعنى إفترقنا! ماتجى عنك أخبار!؟

ودى أعرف ب غيبتى وش تسوين؟

ودى أعرف لضحكة القلب وشصار؟

وشلون لمّا للسوالف تحنين

للحين ضحكاتك نواوير وأزهار؟

للحين بسماتك بها برد تشرين؟

للحينها عيونك بها برق وأمطار؟

بعدك الا منه طرا البعد تبكين

للحينها تجرى تحت كفّك أنهار؟

وللحين وسط المحفظه صورة الشين؟

بعد الوساده تكتنز كل الأسرار؟

بعدك تصلى الشفع؟ وإلا تنامين؟

هى بعدها يدينك بها نور وسوار؟

هو بعده الدولاب حزن الفساتين؟

أحمر شفاتك ظل فى لونه النار؟

إذا بهت مثل الزمن لاتقولين!

بعد الشدو يعمل على عينك حصار؟

باقى حزينه " بكلتك" والتلاوين؟

باقى الحمام اللى على ليل وجدار؟

للحين يبكى لك وإنتى تغنين؟؟

باقى عصافيرك على نفس الأشجار؟

هى نفسها" الركوه" ونفس الفناجين؟

للحين باقى لى معك اى تذكار؟؟

عطرى بقايا ساعتى والدواوين؟

شفتى افترقنا وين ودتنا الاعمار!

شفتى كبرت وصار عندى بزارين

ماعدت أدور لجل أراضيك أعذار

مانى مصدق صار عادى تغيبين

الله يسهّل لك مشاوير وأسفار

وتفتح بوجهك وين ماأنتى تروحين

وقولى عشقنى بس خانته الاقدار

والا اتركيها واسكتى لاتقولين

لحظة ذكرتك طاح عن وجهى ستار

وقمت اتذكر ضحكتك من تمرين

فراق عادى ماأبى غير الاخبار

نفسى أعرف بغيبتى وش تسوين؟؟