جيت لسمارك لاتقولين نسّيان

والله فلا لي غير طاريك طاري

جيتك ادور شرهة العين بلشان

انا دخيلك لا تزيدين ناري

وجيت اتفيا بظل رمشك على شان

انفض من الغربة الشقية غباري

حبيبتي جيتك من الشوق نقظان

جيتك تعيدين الحياة لسماري

وحق اللي ما سواك وشلون ما كان

قلبي يحبك كثر رمل الصحاري

ولك وحشة اللي من السفر جاي ولهان

شايل معايا ذكريات انتظاري

ولك في عيوني حلم يا ظبية البان

حلم الدفا بعيون طير الكناري

احلم اجيب لاصبعك خاتم الجان

وتهلهلين برجعتي وانتصاري

وانسج لجيدك من شعرشمس نيسان

قصايدٍ منها تغار الحواري

وادور بك فبساط الاحلام أزمان

بين الكواكب والنجوم السواري

واحكي لك حكايات عن مامضى وكان

عن دمعتي عن بسمتي ياعذاري

ونسكن اراضي ما يجيها ولا انسان

ماغير أنا وأنتي وفراش البراري