يالعنبو ظروف عني تحدك

عني اقصرت رجلك وانا ماقدر اجيك

عندي خبر والله ماهو بودك

ما هو على كيفك على كيف واليك

لوهو بكيفك دوم يدي بيدك

نصبح ونمسي دايم ايدي بيديك

مير الزمن يالترف ضدي وضدك

ولا الحيا والله باسمك لناديك

لمركب غرامي بين جزرك ومدك

وكل المشاعر في غيابك تناجيك

ان كان كثر البعد والوجد هدك

تعال طالع ويش سوى بمغليك

وان كان دمعك محفي اليوم خدك

عيني تهل الدمع لاحل طاريك

اصبر وحذرا تكشف الناس سدك

ولابد عقب الغيم تصفي لياليك