البارحه ذبيت راس الطويله

وبقعا تسوق الهم فالشعر ليّه

والله كني جالس ٍ في مليله

ومن زود همي قمت افرّك يديّه

والحزن خيّم مابقى فيه حيله

والنار في وسط المعاليق حيّه

والصدر بيدا والعنا ساق خيله

باقصى الضلوع العوج عسّكر سريّه

لاجل ابتهال اجر صوتي واشيله

بنتي ولو كانت علي ّ اجنبيّه

وابليس فالانذال يومي شليله

شيطان انس وبالفعايل حليّه

اهل الردى والشر واهل الرذيله

وكر الخراب ومجتمع به خليّه

روح البراءه في يديهم قتيله

وعيون اهلها من سببهم شقيّه

ما كنّها غابت عن البيت ليله

إطيوفها فالبيت صبح وعشيّه

والوالد المصدوم مهدود حيله

ما عاد يدري كانها اليوم حيّه

وماجد دموعه فوق خده هميله

ما صاب حاله كنّه اليوم فيّه

والام من جور الهموم الثقيله

صارت تشوف الهم حوض المنيّه

تنخى الوطن كله قبيله قبيله

تكفون ردو نور عيني عليّه

وتنخى زعيم ٍ بالسيوف الصقيله

حامي حدود الدار مافيه زيّه

سلمان يا سلمان شوق الجميله

يا ابو فهد بيديك حل القضيّه

يا معدل الميزان عن كل ميله

وعز الخوي اللي غدربه خويّه

ويالقايد اللي فالخطوب الجليله

لك وقفة ٍ يا شيخ بيضا جليّه

كثّف جهود الامن بيّت وسيله

وانت الحكيم ولا توصى بذيّه

ويالله ياللي كلنا نلتجي له

يالواحد المعبود ناصر نبيّه

يوم ابره مجتاح مكه بفيله

ارسلت له طير ٍ قتل فيه غيّه

اسالك بسّماك وصفات الفضيله

ترد بنت ٍ خطفت إبلا خطيه