البارحه ما لجلج النوم فالعين

من علم شفته في قناة الجزيره

صرخة هدى هزت عروق وشرايين

ولافيه شخص من العرب ثار غيره

تنخى عمر تنخاه باول وهالحين

يوم العرب عييت تقود المسيره

وتنخى صلاح وتحتري يوم حطين

يوم الركايب والخيول المغيره

تبكي قهر تبكي اسف وينكم وين

يوم اليهودي قام يجلب حميره

راحو اهلها ضمن ناس ٍ كثيرين

راحو ضحايا وا لضحايا كثيره

هدم البيوت وجرف خضر البساتين

والعالم الغربي عيونه ضريره

قصف المدافع والقنابل وتأمين

احدث سلاح وجاهز ٍ بالذخيره

والشعب الاعزل عاش مابين ناريين

نار الحصار ونار جور الكسيره

من شان جلّعاد اليهود الملاعيين

شنو هجوم ٍ من خفير لخفيره

صار اليهودي قيمته عن ثمانين

مسلم وقيمتنا بوزن الشعيره

يوم العرب عند الهوى والمزايين

وكل ٍ على ليلاه يشعب بعيره

شوف الشباب اشلون شوف المحبين

ما بين دينا مع مواويل ميره

وشوف المساجد كيف قل المصلين

وقت ٍ بلاّنا شر وانكف بخيره

وشوف المراقص كيف وضع المغنيين

ما بين هز ارداف واكواب بيره

تخدير للامه بسمّ الثعابين

فعل اليهود وخطة ٍ من خبيره

بغداد راحت يوم راحت فلسطين

وصارت على وجه العرب وصم عيره

فينا الخيانه طبع من عام خمسين

من يوم بعناها بعشرين ليره

جيد العرب ياناس ما بينهم بين

واهل الكراسي زادو الشعب حيره

وشلون ننسى يا ملا عام تسعين

يوم الجوير احتل ديرة جويره

صدام شن الحرب في صفه حسين

وراع اليمن شاور وأرسل شويره

وإذاعة الخرطوم ترسل رياحين

وجاك الخطاب اللي يشيله سفيره

حتى الفلسطيني نسى خيرنا سنين

وارسل خطاب الحرب وارسل سفيره

خل العرب تبقى على وعد تشرين

لين الجيوش تحل شبه الجزيره

تعداد الامه ما يقدّر ملايين

لكنّ مابه شخص مهدود طيره

والجمله اللي واضحه بين قوسين

باقولها قدم الجموع الغفيره

السن بالسن وترى العين بالعين

والحرب حلّ وجاك دقّاق زيره

صدورنا ضاقت وكنّ البراكين

شبت بوسط الصدر نار وسعيره

تكفون يا روس الرجال السلاطيين

الذلّ حلّ بكل دار ٍ و ديره

إليا متى نبقى على الذلّ راضين

والعمر واحد مالنا عمر غيره

امّا حياة العزّ وإلاّ تموتين

يا نفس دون الحق موت المغيره

وياللي تشرّع للسلام القوانين

دوك الكلام وفي عباره قصيره

الحق حق ولو غدى لازم يبين

مصير مجد العٌرب يرجع مصيره

ما دامنا فوق البسيطه مقيمين

من دون دين الله حجاب وستيره

ويا خادم البيتين يا حامي الدين

يا القايد اللي ما تغيّر ضميره

يا مسند الامه على العسر واللين

حنّا جنودك بالليال العسيره

جاك الولا والعهد وافيين وافيين

والدار من دونه سيوف ٍ شطيره

الله يمد بعمرك سنين ودنين

يالقايد اللي ما تغيّر ضميره