لفّ الزمان وجيت تزحف على إيديك

وتقول : جرّبت الزماااان ولفيتك

إما تمد ّ الكاس تسقي إراضيك

وألا تصد ّ تقول : روّح نسيتك

ياهاجري مأبغااا أجامل وأداريك

دامك جفيت القلب فعلاً جفيتك

الصوت بح بداخلي يوم أناديك

كنه سجين يقول لا مااا هقيتك

ياما تحملت الألم من تغليك

وياما تحملت الغياب وشريتك

طلبت روحي قلت : خذها وتفديك

وطلبت قلبي قلت : هاك وعطيتك

إليا خذيت العين شف ذيك تبغيك

وإليا أنهدمت بجوف صدري بنيتك

قدّمت ما أملك لحضرة معاليك

والشاهد الله كان هالقلب بيتك

أحسبك شاري قلت : بالعون شاريك

وأرخصت لك قلبي وعمري هديتك

ماكنت أحسبن الزمن ذا يقسيك

حتى أكتشفت الغدر فيك وقريتك

ياقلب وش لك في حبيب ٍ غدر فيك

ياما نهيت الحب عنك ونهيتك

الله يجازي من يفكر يخليك

ويجازي إلسان الهوى لو طريتك

ويا خلّ مالك غير (ربي يجازيك)

والرد وآضح روح فعلاً نسيتك