يقول من بالصدق يبدي مثايله

ماهوب يم اللي ينقض جدايله

اقولها في منبع الجود والكرم

هذاك هو عبد العزيز وسلايله

احبهم واحب حي ٍ يحبهم

وغايات مثلي ماتبرر وسايله

يامير حسن الظن يمك يقودني

وهم ٍثمان سنين يامير شايله

ابوك ماقصر علينا وعزنا

يوم الولي عزّه غشتنا فضايله

هذا كلام الصدق مانيب كاذب

والناس تشهد لي بمانيب قايله

عسى جنان الخلد منزل معزي

عبد العزيز اللي تعجز فعايله

عبدالعزيز اللي عرف من يوده

ورفعله البيضا على كل طايله

وحنا ليا جينا نبا منك حاجه

رديتنا لاصغر موظف نحايله

وش ذنبي اللي دون جودك يردني

ونجمك طلوعه كل الامه تخايله

ان كان مابذلك بدنياي نالني

بالاخره كل ٍ يدوّر عمايله

ومثلك يبا يدمح ليا اخطيت زلتي

لوانها يامنبع الجود عايله