الله يا عالم خفي الغيب

اسالك بسمك يا كريم تجيب

حقق لي اسباب السعاده كلها

واعوذ بك من شر كل طليب

ومن بعد ذا يا راكباً فوق حمرى

فجا العظود وعظمها صليب

من ساس عيرات ٍ قديم ٍ صيتهن

نجايب ٍ منجوبة ٍ من شيب

حمراً نواظرها تقول خلاصة

جمرة غظاة ٍ ولعت بشعيب

كن الحيايا تلتهب بجنوبها

وليا اهرفت تهرف هريف الذيب

مدارها الجمال واوجر فوقها

مرباعها من وارده لمغيب

واخترت لي قرماً مثل ما اخترتها

نجيبةٍ ركابها نجيب

من عندنا تسرح مساريح القطى

ليا طاب نوم السلهدي السيب

ازكى تحياتي مع اخلص مشاعري

معه ولا احد يوصي النديب

ومن بعد خمس وجاب خمس ٍ مثلها

فيها المبيت ومارد القليب

تلفي على فرز الوغى منقع الصخا

الطيب راع الطيب ساس الطيب

معرباً مابين ابوه واخاله

ولا دق بسلوكه منابت ريب

يا صاحبي عرضتني راس عيطا

وانا احسب إني من جداك قريب

وقامت تناهشني الكلاب بنابها

وسكت وانا لا إسئلت اجيب

وعلي للاصحاب حقاً لازم

غيض البغيض وبهجت الحبيب

والا فاندري وش مصير الدنيا

زوال والباقي بحكم الغيب

ومن لا يحوش المرجله في شبته

ماهوب مدركها بحل الشيب

ومن لا يرى قدر الرجال وفضلهم

يصير مسهاج ٍ لهم ويخيب

ومن لا تعب في قولة اهلا ومرحبا

والله ليالقى قلة الترحيب

ومن طاع نفسه ودته للتهلكه

والصبر مبدى قومة النصيب

ولا خير في رجل ٍ يخون امانته

عينت عقب الزود وين كليب

والصيد بالغرات حيلة عاجز

كانك لحالك قل علي رقيب

لا تحسب أن الله يغفل ساعه

او إن ما تخفي عليه يغيب

أيامنا عدة سنين وتنقضي

شمس ٍ تبين ألنا وشمس تغيب

كم فرقت قدامنا من هجمه

وكم مهدف ٍ يبكي فراق الصيب

وكم واحد ٍ فيها ولا يدريبها

ملي البطن همه وملي الجيب

وكم واحد ٍ دايم حصاته حمرى

وفي حسب باله من عماه مصيب

وكم واحد ٍ بالصامله ما ينبغي

وقت السعه يشره بجدعة ذيب

قلته وانا عقب التجارب واعي

والله ولي حسيب كل حسيب

وازكا صلاة الله وازكا سلامه

على النبي المصطفى الحبيب