شَعرك
الْ كان يلفّني ويْنامْ
ويطير فيِّي بْجانِح الأحلامْ
ياما نْظَمْتِلُّو قَصايِدْ بكْر
ما خطّها شاعر وَلا رسّامْ
شعرك الأشقر متل ضوّ الشّمْع
هالْكان يلمَع
بالليالي لمْع
ياما وياما مْحَمِّمو بالدَّمع
ومْمَّشّطُو لِلْخَلْف وِلْقَدَّامْ
كنْت مِنّو لِعِبْ ما إشبع
لِفُّو عَ إيدي
مَقْطَعْ ومَقْطَع
بالكون كِلُّو شَعر ما بقْشَع
ياحبال شمس مْخايْلِة عَ رْخامْ
قدَّيْش بدَّا تْنوح الِمْخدِّة !
الْ هامِتْ بشَعرِك هالحلو
قدِّي
وقدَّيْش بَدُّو يِفِقْدو خَدِّي
اللِّي فضَّلو
عَ ألف ريش نْعام
وقدَّيْش بدّو التَّخت
يِتْذَمَّر
لمَّا بْيعْرِف شَعرِك تْقَصَّر
وقدَّيْش بدَّا قْلوبْ
تِتْحَسَّر
لمِّنْ رح تْطِّلِّي بِهالْهِنْدامْ
كنتي
إذا بْهالحيّ رِحْتي شويّ
تِعِمليلي مْظاهَرة بالحيّ:
هايْدا يْصَرِّخْ آخ،
هايْدا خيّ
هايْدا يْرِشِّكْ ورد
هايْدا خْزام
وْهايْدي
تْناقِرْ جَوزْها المَفْجوع
هايْدي تْهَدِّي إبنْها المنزوع
وْهايْدي تْشارِع خيَّها المَوجوع
لكنْ ِبشَرْعي
ما حدا بْيِنْلام
بِدْعي على الحلاق؟!،
شو ذنبو ؟؟
معقول؟!،
مُشْ معقول ما حبُّو
ما قَصَّرو،
ولا طاوعو قلبو
لوما بْشِغلو للقرش خِدّام
بِدْعي على التّمْدين،
عَ الموضة؟
وْبِدْعي على أذواق مَمْروضة
بِدْعي عَ عصْر النّور والفَوضى
يِلْعَن أبو التمْدين
والأيام ..
الْ مِنْ شَعرك المِشَّقَرّ
حرْموني
وشالو حِلِمْ أخضر مْنِ عْيوني
ولوما تْكوني شْويّ مجْنونِة
ما تْركْتِي مْقَصّ ..
يِلْمُسْ لَمْس .. الشَّعر اللي كان يلفّنا ..
ويْنام.