لا يالحمام اللي صفقت الهبوب وحمت

تصبّح على داري وتمسي بعماني

لياضاق صدرك طرت لرضاه ماخيّمت

على ماتبي ماردك فلان وفلاني

هنيّك وانا لاطحت طيحة هوى ماقمت

ماغير اصفق الإيدين واجر الألحاني

عليك انت ياللي جيت بالدرب/ ماسلمت

تراي اتبع .( محمد ). ولاني بنصراني

انا لو كفرت بغيتك بالوصال اسلمت

مهي سالفه بإنك [ تمر وتعداني ] !

تغلا علي ولاحداك الزمان وشمت

وانا اللي لك ابقى لو زماني تحداني

مقصر بحبي لك وبَلومك ولا لمت

اخاف إني اكسر خاطرك واعقد لساني

شريتك ولابعتك بسوق الغرام وسمت

وجتك المشاعر والأحاسيس مجاني !

جرفني هواك وجيت كلي معاه وعمت

ولا صار لي ماصار مع واحدٍٍ ثاني

ماهو عيب ولا ذنب ولا خطا لاهمت

ياكم شيخ دين وقوم/ هايم وغرقاني

عليك الله وستره وآمانه ليا سلهمت

وعلي الله وعفوه على ضعف الإيماني

رموشك على [ بدع القصايد ] تثير الصمت

وعيونك لها المنّه على بدع قيفاني

تقول: الغلا كيفه؟ وانا اقول: لو قيّمت

محبتك بإخواني ترديت بإخواني

وتقول: إن حداني وقتي وللسفر عزمت

وش الحل؟ واقول: إني اعيش وحداني

وتقول: إن تضايق خاطري من زماني نمت

وانا اقول: مثلك مير ما انام سهراني !

تبين المعزّه بالوصل لوّ ماعلمت

وتبين [ المحبه , والموده ] بالأعياني

عسى الله يرضالي عليك/ وكرمت ودمت

وتقبل تحياتي وشكري وعرفاني !!