من أعماق الخفوق اللي نبض لك شوق وموده

إلى شط الخفوق اللي نبض لي صد ومفارق

تعبت وما بقى فيني وربي للتعب شده

ولا دري وش يخليني أسير (فحبك ) الشارق

أجي النسيان مكفوف تخونه يدينه وعضده

وأنا الكتمان بي عين تسيل ومبسم غارق

وتاخذني إلك ذكرى وصبر لو جبل هده

وأرد وكن نسياني مرقت بجانبه مارق

أرد أتاملك حلم جميل لو صدق وعده

ولا أستفسره خوفي لا تبده قصه البارق

ولك باب يجيب الريح أنا أقسمت ماسده

يا عمري كيف وبعادك أشوفه الضيف والطارق

تصدق كل ماحبك عظامي حست فبرده

أقوم أمشيك وأتعثر وأطيح بشاسع الفارق

وأرد أتالمك جرح سببه الخافق وصده

وهم كل ماسالت دموعي صار بي وارق

وقلب غارق بحبك ولا أحد مد له يده

وروح تجلب أنفاسي لهيب بالصدر حارق

يا عمري ما بقيت حيله وصبري طاح به عمده

تعال وطفني شوق كفاني صد ومفارق