الكلمه اللي مع العالم تداولها

ومضمونها طيبٍ هي شانها شاني

وان كانها غير ذلك لو تناقلها

جمعٍ من الناس مايلفض بها الساني

الهرجه الضايعه بالحيل عاقلها

اخاف يمشي بها القاصي مع الداني

وانا اليا جيت قوم وشفت عاقلها

يركض مع من هرج من غير ميزاني

ابعد من مجالستهم ماتحملها

واعتاض في جيهم مجلس كحيلاني

طلق الحجاجين والترحاب باولها

وسوالفٍ تعجب اللي صوبها عاني

ورِدي المخاليق ماليبه ووصلها

ياللي تودي اعلوم الناس مجاني

تشوم نفسي من الرديان وعللها

دربٍ ورثته من ابائي وجداني

واصد ماسمع هروجٍ كثر خاملها

ماسمع لها ولو معانيها تنصاني

الا اذا بينت لي وشفت قايلها

خذيت له من قوي الباس شاماني

وان جار وقت القرابه وقل عادلها

فانا مع من عدل ماهي تعداني

اعز من عزها وارفى خمايلها

ارقى بها الضلع مانرضى لها الداني