بديت باسم الاله اللي علينا رقيب

سبحانه الله رب معتلى في سماه

هو السميع العليم الغافر المستجيب

الواحد اللي مانعبد غيره ولاسواه

يارب تجعل لنا برضاك حظ ونصيب

عبد دعاء مخلص لك تستجيب لدعاه

واغفر خطايا عبادك يالسميع المجيب

وانزل لنا الغيث مدرار لنا من سماه

وابعد هل الشر عنا من بعيد وقريب

واحفظ بلدنا وتنصرنا على من عداه

واحفظ لنا القايد الفذ الوفي النجيب

اللي تربع على عرش القلوب ابوفاه

المومن اللي ايمانه ما دخل فيه ريب

واكرم من المزن لاخيل وهثهث بماه

مليكنا اللي نحبه حب ما هو غريب

هذا حصاد الوفاء اللي بفئدتنا بناه

واحفظ لنا من على يمناه رايه صليب

ولي عهده وامينه مستشاره واخاه

واللي بعده هلا من هاجس مايغيب

يجزا الكريم ابكرم يجزا الوفي ابوفاه

مانيب واعظ ولالبست بشت الخطيب

ولادرست النحو والصرف مثل النحاه

ولانيب شاعر اليا ابحر في المعاني يجيب

ولاضمن فرسانه اللي رافعين لواه

انا انسان معرض يكمن اخطي واصيب

لكني املك مشاعر مثل حجم السراه

مشاعر الانتما للاصل ماهو غريب

وكل تعرفه ليا عرفت ويش انتماه

لي وجهة مايحددها مكان قريب

وراء مدارات الانجم والهدف من وراه

فيها مقمات قوم زادوا الطيب طيب

لين الزمان انحنى من طيبهم واحتواه

وقفت اسال الزمن واقول هل من مجيب

سجل لنا يا زمن مجدن نسوه الرواه

سجل لنا يازمن من هو يضد الحريب

دون اتربه حربة تفرا كبود الغزاه

وبوارقن تنكسر وجموع راحت هريب

يوم النخل غاطسن في الدم مكان ماه

عادتنا لاركبنا لافحات السبيب

ونادا المنادي لحوض الموت للي يباه

نقلط سوى مثل ورد فوق جال القليب

يحتار من قال الاول ذاه والاهذاه

ياما عمدنا على القالة وجتنا غصيب

وياما عدو سهجناه ورعينا حماه

مجدن كتب بالذهب مشرق ولافيه عيب

بصفحات بيض بياض الشمس يوم الصحاه

وياما دخل في حمانا مستجير غريب

وفتحت له ارباعنا لو راح فاي اتجاه

والجار له في ذممناحق لازم وجيب

هو المقدم على انفسنا باللي يباه

ووجيهنا بيض لاخانوا خباث النصيب

واللي يجي في لحانا جت لحانا ذراه

هل يازمن ذاه يكفي او تبانا نجيب

ياما بقى مجد مطوى ما لقى من قراه

لقبيلة ذات عد وجد واصلا عريب

الهم على منكب التاريخ عزن وجاه