البارحه والجوع مس الذيب يوم انه يعوي

على سنام طويق والقمره وراه بليتها

اخايله واقول واعزي لحالك يالقوي

اللي تنقى في سمان الفطح لا من جيتها

واللي باساميك يتقلدها الخوي مع الخوي

والعرب تبديك التحايا وانت ما حييتها

واسمك على النخوه يعد وكل روس(ن) تشتوي

والوجبه الحيه تعشاها وتترك ميتها

الجوع لو يدفعك للموت الذحاح المستوي

حشمت نفسك عن عظام الحرجه وخليتها

ودامك طليق(ن) ما قهرك المعتدي والمهتوي

وخطاك من دون المغازي ما بعد سجيتها

يا ذيب يا ذيب الخلا اللي ليلك يروح سروي

ما بين مرحان الشواويه ليا عشيتها

يا موجل(ن) قلب حضري يا موجل(ن) قلب بدوي

ياللي تشيّم خوة الرجليه ان خاويتها

عامل خوي الذيب في عصر الفوات المنطوي

وقصتك فآذان العرب واليا طرت لبيتها

نحر ذلول(ن) من وصايفها شحمها مرتوي

لعيون خوتك الفريده والبقا في صيتها

يا ذيب يكويني قنيبك لا توحّيته كوي

على غشاش الكبد والخطوه عمد رديتها

مدري غبى مدري ذكى مدري تسرع فوضوي

لكن خطواتي على الهيبه ما قد ضريتها

ياذيب عزك في زمان السيف من قبل يهوي

وقبل زمان العولمه للناس وآتيكيتها

وقبل يغيب المنطق الحسي ويبقى المعنوي

والغيره توزع تجمّعها على تشتيتها

وقبل النوايا المستقيمه ماتعاج وتلتوي

والناس تمشي في تعاملها حسب توقيتها

يا ذيب مدري كيف ابوصف حالتك يالمنزوي

والهاشميه في طرف عيني ولا دنيتها

لا جيث ابرثي حالتك ضاع الكلام اللغوي

والمفردات اللي تجملني ليا عديتها

والهاجس اللي كل ما فليت حويه ينحوي

وافكاري اللي تتعب الخافق ليا هليتها

واخاف لا تكمل وينحاك النزيف الدموي

وابقى على قول المثل خميتها واخطيتها

ياذيب واقنب خل صوتك يدوي العالم دوي

مادام خانتك الظروف الله يخرب بيتها