سال لمجرب لا تسال طبيب
كلمة قالوها ناس زمان
صادقة ما فيها تكذيب
وأنا لمجرب يا إنسان
يا اللي في الحب غادي تبدا
ترمي بديك قلبك في النار
قرب عندي سألني بعدا
شحال قاسيت فهاد النار
إياك ياعاشق تسلم
ياخذك لهوا ويحلق بيك
يخليك فسماه تايه تحلم
أحلام جميلة بيها يغريك
تشوف الدنيا فصورة جنة
بشكل جميل باهي فتان
فحلاوة الحديث ألف معنى
تسحر العاشق الولهان
فبحور لهوى مواج خطيرة
وشحال خدعت من سباح
خداتو رماتو فجزيرة
خانتو قدفاتو لرياح
إياك تقرب خليك بعيد
لبحر عميق مافيه أمان
طبعو غدار قاسي وعنيد
عمرو مارحم أي إنسان