ماقلت لك بكره بتنسى حبي وضحكة شفاهي ؟

ماقلت لك لاتقترب لنّي أنا عشقي جنوني؟

ماخفت إلا من غدي أدري يخبي لي دواهي

ويمرني هذا ال غداّ يااالله ما أصدق ظنوني !!

ماكان يربطنا عدا بوح الشعر وفنجان شاهي

ماجمّل الجلسة سوى نظرة جريئة من عيوني

حولي ولكنك قدرت ألحين تحتل انتباهي

حسيت انك بالفعل غيّرت تاريخي وكوني

وش صابني ؟؟ مدري ولكن ياا إلهي ياا إلهي

وش صار في دمي كذا يغلي ؟؟ وليش احْمر لوني

حبيت لجلك الحياة / والحب / واحساس المقاهي

حفظت لجلك كل قصيدة كنت تسمعها اذوني

جعلت بك سيّد على ضلوعي وآمرهم وناهي

كشفت لك عن امنياتي واعترافاتي وفنوني

لنك طفل يعني تحب تلعب معي لعبة ملاهي ؟؟

يعني تحب الطيش فيني وماتراعيها شؤوني ؟؟

أو انت مغرورٍ جعلت الحب ذروات التباهي

ترضي غرورك شاعرة بمبدأ ( أكون ولاتكوني )

وبعدين وش فادك تشوف الجفن محرومٍ وساهي ؟

وانت الذي ياما قضيت الليل بتدلل جفوني

ألحين كل شي اتضح صار الأمر ألحين باهي

عادي معك لو عشت عمرك بي أو انك عشت دوني

لكن أنا عندي ثقة في ان لاهذي ولا هي

بيقدّرون احساسك الميت ولابيعوضوني

هاذنت خيبت الأماني وبين هالسيجار لاهي

ماقلت لك ما يقنعك عطري ولا ترضى بدخوني؟

ماقلت لك ورطتني ؟؟ من يسمع أناتي وآآهي ؟؟

الله يقدرني عليك الله يكونلّي ف عوني