دقت الساعة الأخيرة وابتدت ( رحلة كفن )

سل عزرائيل سهمه وارْتدَت روحي جناح

ماتت أجهزتي وأوردتي وأعضائي ( غفن )

سلمت روحي الحبيبة وانتشر عطري وفاح

انتهت رحلة حياتي بعد ماسنيني اكتفن

ضمّنت خيري وشري واحتوت جد ومزاح

ساكنة كل الجوارح والشرايين اوْقفن

والملأ إلتفوا حولي للبكاء وللنواح

ودي أصرخ بأعلى حسي أو أحرك هالجفن

اختلط حالي بحالي والدمع فوقي وساح

زارني "إبليس" يتسلل بكل خفة وفن

ضحكته غصة أليمة زادني رهبة وراح

أسمع الأصوات جنبي بس شمعاتي انطفن

أنده أهلي / أقربائي / لا مجيب لهالصياح

غسّلوني وطهروني وجملة أخطائي انزفن

يحرق الماء هالجسد اللي شكى مشهد ذباح

كفنوني بالبياض وخلفي أصوات اهتفن

حملة التكبير حولي تنقلب خوف ونباح

احملوا نعشي وساروا والمداين ضيفن

ضمني أنقاض حفرة من بعد ذاك البراح

اختفى حفّار حبري وجسمي في اللحد اندفن

اتركوني للعويل // وودعوني للجراح

تنهش الديدان جسمي وصاب هالجثة عفن

ضيّق اللحد بعظامي ,, صوت : ( حي على الفلاح)

يبست أنهاري وجفت باقي أجزائي اختفن

تلعب الأمطار فيني والعواصف والرياح

ليتني ماكنت إلا كومة تراب وزفن

لينت ماشافت عيوني لا مساء ولا صباح

ربي اشفع لي الخطايا اظهرن ولأ خفن

أطلبك ربي ثواب وارتجي منك سماح