يالله يا علام كاين وما كان

ياواحدٍ كل أمته يرتجونه

تفرج لمنهو بين الأتراك منهان

من غين قاصر دارهم لي مهونه

ودي بشوف ديار مروين الأسنان

أهل الشهامه والوفا والمعونه

أفعالهم ماهي بزور وبهتان

فعل شهير والعرب يذكرونه

الله يسقى داركم ياعجمان

وبل من المنشا تكاشف مزونه

أسود عريض ريض له تحنحان

كن الهنادي سلك في ركونه

من حومة النقيان لا حد قصوان

تسبل هماليله ويسود لونه

ويسقى من العرفا ليا جو سوقان

والصلب حيث ان لابتي يدهلونه

ديرة بني عم على الخيل فرسان

والضيف لا جا دارهم يكرمونه

حامينها بقدمى صنع نجران

شلاع ما يبرن الأطباب كونه

وحدب تقص الراس من حد الأمتان

يقضي بها الديان باقي ديونه

بايمان قوم لا احتمى الهوش فرسان

والضد لو هو نازح ياصلونه

جلابة للروح لا ثار دخان

والروح لوه غالي يرخصونه

كم شيخ قوم طوحوا به بالأيمان

خلوه بالميدان يطرخ زبونه

ومن زان حنا له على الزين خلان

ويامن وحنا بالعهد ما نخونه

وليا نوانا بالقوامات خسران

يبطي سهير ما تغمض عيونه

وصلاة ربي عد هتاف الأمزان

لمحمد اللي منهجه يتبعونه