اعوي عوى الذيب الأشهب وهرف هرافه

واعدي معاديه وطرش مع مطاريشه

وامسي مماسيه واشرّف بمشرافه

واضوي مضاويه واغبش مع مغابيشه

الذيب مبداه وهرافه ومذلافه

ومسراه وعواه ودورته على العيشه

وانا بلاي وحنين القلب وتلافه

على الذي ما ينوشنه مناويشه

الصاحب اللي يحير الفكر باوصافه

وان كان ضميان ما يروي معاطيشه

غصنٍ يكلّ القلم ما يحصي اوصافه

قضيب موزٍ تظلل في معاريشه

مير الغضي رافضٍ مطلوب ميلافه

مدري متا ينتصر جيشي على جيشه

غزال ريم يعني رجل لقّافه

ابعد من اقبه على القناص من بيشه

مايدرك اللي يريده منه حوافه

وردٍ صعيبٍ على الطماع تفتيشه

واخد مثل القمر في ليلة انصافه

يجهر بياضه وحب الخال تنقيشه