تدرين وش حد محبوبك يجي شاعر
ويرسم على الرمل .. نقشٍ ماتعرفينه؟
إنتي ، وجور الزمان ، وحظه العاثر
والاّ المشاريه والاّ ضامي سنينه
والاّ رجوعه من دروب الهوى خاسر
دليل ياسه صفير الريح بيدينه
***
يشهد علي القلم .. ماعاد عندي جديد
ياكود ذكرى قديمه .. باهت لونها
في غيبة الملهمه .. مانيب ويا القصيد
مدفون في عالم النسيان لعيونها
***
بين الانقاض جيتي تبعثين القصيدة
وشال قلبي بقايا الذكريات وحضنها
عظمي العشق يسري به جريده .. جريده
يا عيونٍ تذوب اسرارها في وهنها
تفهمين القصيد؟ اليوم هذي جديدة
لأجل (شوق المرايا) من بحوره وزنها
***
الهوى مسباح والوقت أصابع صوفي
آه.. يا ثقل الخطاوي هاك العصريّه
أطرد أمواج البحر لين يكسر شوفي
ما ملا عيني .. من العابرين بنيّه
ما تبكّين الورق يا سحابة طوفي
بانتظر هتان .. وأشره على وسميّه