كيف ابا اكتب والقصايد شمس والمهموم عاري

كل ماهميت في فكره عصت وادمت يديه

والمشاعر ماتعرف اللين وانصاف المواري

جمرة لو شربوه البحر وسط الروح حيه

يالبعيدة لوعرفتي كيف لاهبت طواري

والحشا عن صد بعض الحزن ماله مقدريه

الله اكبر كيف وطى الود راسه للذواري

الخوي عقب الموده صد واقفا عن خويه

لاتقولي كيف مات النور وارمدت بنهاري

من عرفتك ماخبرت الصبح والشمس حيه

يومها بيدي وانا اللي ماترددت بقراري

قلت:حر الصيف وعيونك وخليت المطيه

كنت احسب إني لمست الغيم واتعبت المساري

من كثر فرحي اد اخطاي واسمي عليه

مير مافادت مع الفارس معاذير الصحاري

من قبل عذر الصحاري يرتوي بالمهمهيه

لو عرفتي فيك سر ضعفي واسباب انكساري

ماوقفتي مع شقا ايامك ونزواتك عليه

لو عرفتي كيف كنت اخسر وانا اشوف انتصاري

كيف كنت السيف والجاني وجرحك والضحيه