البسمله تخزي جميع الشياطين

بسمك بدينا ياجويد العراوي

ياهازم الأحزاب ياناصر الدين

ياخير من يدعى لكل الدعاوي

أنا دخيلك يوم نصب الموازين

وأنا بوجهك عن جميع المساوي

عساك ياخلاق الأنسان من طين

تفزع لنا يوم المحن والبلاوي

العمر مهما ياخذ أيام وسنين

يطويه بين اليوم والليل طاوي

يالأدمي لو طال عمرك على وين

لابد من يومٍ على القبر ضاوي

إفطن ترى دنياك لعبة وراعين

لو مدحوها بالأمل والمناوي

ترميك تياراتها يسار ويمين

ولنت بعليها لو تقاويت قاوي

إن جنبتك أمواجها والبراكين

ماجنبتك همومها والشكاوي

أقفت بروس الأنبيا والسلاطين

لاجاملت معهم ولاهيب تاوي

تضرب بسيف وخشم حربه وسكين

فوق الكبود الغافله والكلاوي

من يومها تطبخ وتاكل ملايين

وتمسي تحد الناب والبطن خاوي

قانونها يغلب جميع القوانين

وهقواتها تغلب جميع الهقاوي