م الأوضه
للسلم
تتمرجح اللنضه الوحيده فى الشارع
القطط تتنطط فى صفايح الزباله
مداخل العمارات
بتفكرك بابواب الطُرب الحديد
تتملى عنيك بالرعب وتوسع
تحس إنها قد فتحة البرميل
يمكن حسيت برعشه فى ايديك
وبتنميل فى رجلك اليمين
تكتر قدامك القطط السوده
وتوسع الكاميرا
على مشهد النهايه
حا يعلى صوت خربشة جزمتك
على الأسلفت الخشن
وتزيد بصاتك لورا بسرعه
حا تتخيل مفتاح شقتك مسدس
وبخفة راجل بوليس مدرب
حا تلف يمين وشمال
ويزيد رعبك لمّا تحس بالميداليه
اللى فيها المفتاح بتترجرج بعنف
الشارع الفاضى دا
والحوارى اللى زى الكلمات المتقاطعه
والشبوره اللى مخبيه الشجر
بتزود رعشة إيدك
وبيتهيألك
إن كل القطط السوده
حا تتحول أشباح
تتملى الشوارع بالجثث المسلوخه
دى إيدين ست عجوزه فيها غوايشها
باين عليها فى السبعين
ودا راس عيل حواليها الدم المتجلط
فساتين من جلد النسوان
متعلقه بمشابك حديد
على حبال العمارات
اللى مداخلها بتفكرك بابواب الطرب الحديد
حا تزُك وتتسحب على بطنك
حاتطلع السلم
مفتاحك فى ايديك
اطمّن
افتح
حا تنط فى وشك قطه
حا تخش برعبك على السرير
حاول تنام
ياراجل دا مجرد فيلم
ما تخافش كدا !.